Сіздерді әл-Фараби атындағы Қазақ ұлттық университеті мен Биология және биотехнология факультетінің 90 жылдығына арналған «Биология ғылымдарының тұрақты дамуының заманауи үрдістері» атты халықаралық форумға қатысуға шақырамыз.

Сіздің осы форумға қатысуыңыз қазіргі жаһандық мәселелерді шешуге бағытталған ортақ жауапкершілігімізді көрсетеді. Бұл іс-шара Тұрақты даму мақсаттарына (ТДМ) қол жеткізу жолында ынтымақтастық пен серіктестікті нығайтудың бірегей алаңы болып табылады. Биология адамзат өркениетінің дамуында аса маңызды рөл атқарады. Адам өмірі биологиялық заңдылықтарға негізделеді. Күн сайын дерлік биологияның түрлі салаларында жаңа ғылыми жаңалықтар ашылып, заманауи технологиялар адам қызметінің әртүрлі салаларында енгізілуде.

Ағзалардың және жеке тұлғаның дамуы, денсаулықты сақтау, қолайлы орта қалыптастыру, ағза мүмкіндіктерін пайдалану, өмір сүру ұзақтығын арттыру, тіршілікті қамтамасыз ету мәселелерін шешу, табиғи жағдайлар мен ресурстардың өзгеруі мен сарқылуы, табиғатты ұтымды пайдалану, биотехнологияларды қолдану, планетаны сақтау және басқа да көптеген мәселелер биология ғылымының дамуы мен оның соңғы жетістіктеріне негізделе отырып зерттеліп, шешімін табуда.

Біз бұл форум барысында талқыланатын пікірлер мен ұсыныстар климаттың өзгеруі, ресурстардың сарқылуы және қоршаған ортаның ластануы сияқты өзекті жаһандық мәселелерді шешуге ықпал етіп, болашақта интеллектуалды әрі экологиялық тұрғыдан тұрақты әлем қалыптастыруда маңызды рөл атқаратынына сенімдіміз.

Ізгі тілекпен,

ҰЙЫМДАСТЫРУ КОМИТЕТІ